Gadan an tulong katao mantang rinibong kaharungan an naraot sa matinding pagbaha sa sirangang parte kan Romania, sigun sa mga opisyal kan nasyon.
Kabali na digde iyo an pagkagadan kan duwang gurang na babae, edad 85 asin 83 anyos. Susog sa emergency response agency kan nasyon, nasa 25 villages sa siyam na probinsya an apektado kan makukusog na pag-uran na nag ugat nin mga pagbaha.
Naraot man an mga bubong kan mga kaharungan, nawasak na mga puon nin kahoy, asin pag-sarado kan nagkapirang mayor na tinampo sa lugar.
Mantang sa banwaan nin Brosteni sa Suceava, gabos na agihan palaog an dae pa man maagihan.
Kinaipuhan man na gumamit an mga bumbero nin excavator tangani makua an saro sa mga bangkay gikan sa salog na umapaw sa lugar.
Basado sa mga video na pigheras kan mga awtoridad mahihiling an mga harong asin lunadang pig aanod kan tubig, mantang padagos an paghahanap nin mga posibleng biktima.
Mientrastanto sigun sa Environment Ministry, nagkapirang salog pa an nag abot sa record high na antas kan tubig, asin presenteng isinasagibo an pagsasa-ayos kan mga naraot na tulay.
