NAGA CITY- Iridoan 3 indibidwal makalihis an magkasuway na insidente kan pananaga sa probinsya nin Quezon.
Sa nagunong impormasyon kan Bombo Radyo Naga sa Quezon Police Provincial Office, napag-araman na mantang nagkakaigwa nin inuman sa Sitio Rancho, Brgy. Canuyep, Mulanay, Quezon an biktima na binistong si Alyas Julio, 69-anyos, asin an suspek na si Alyas Jonard, 28-anyos, parehong residente kan nasambitan ng lugar kan magkaigwa nin mainit na argumento an duwa na nagin resulta kan pananaga ni Alyas Jonard sa lawgon asin takyag si Alyas Julio.
Tulos man na pigdara sa ospital si Alyas Julio para sa asistensya medikal mantang naarestrar man an suspek na si Alyas Jonard.
Mientrastanto, lugadan man an duwang lalaki sa Sitio 4, Brgy. Kanluran Domoit, Tayabas City.
Binisto an duwa na si Alyas Richard, 32- anyos asin alyas Jomar, 29-anyos parehon residente kan nasambitan ng siyudad.
Basado sa inisyal na imbestigasyon, napag-araman na nag-iinuma an duwa sa luwas kan harong ni Alyas Richard kan mag-abot an armadong suspek na si Alyas Gerald, nasa legal na edad, asin sa dae pa maaraman na rason, pinagtataga na kaini si Alyas Richard sa walang tuhod.
Mantang pigporbaran man na pugolan ni Alyas Jomar an suspek alagad nataga man ini kan suspek sa saiyang tuong kamot.
Huli digdi, parehong pigdara sinda Alyas Richard asin Alyas Jomar sa ospital para sa asistensya medikal mantang tulos man na nagdulag an suspek sa dae pa maaraman na deriksyon dara an bolo na ginamit kaini sa krimen.
Sa ngunyan, padagos pang pig-aaram kan mga otoridad an posibleng kinamomogtakan ni Alyas Gerald.
