NAGA CITY- Irido an tolong persona kabale an sarong soldado sa banggaan kan duwang motorsiklo sa Barangay Pinaglabanan, Goa, Camarines Sur.
Sa nagunong impormasyon kan Bombo Radyo Naga, napag araman na mantang binabagtas kan biktimang si Cpl. Benjamin Hernandez, 32-anyos, aktibong miembro kan 83rd IB Alpha Company an tinampo sa nasambitang lugar kan makalaog ini sa linya kan kasabatan na mga lunadan.
Katakod kaini, nagsalpok an nasambitang motorsiklo sa kasabatang motorsiklo ni Carlo Delfino kaibanan an backrider kaini na si Ronnie Brazes, 20-anyos.
Nagsapo nin lugad sa manlaen laeng parte kan saindang lawas an mga biktima asin tulos man idinalagan sa ospital.
Sa ngunian, nagpapadagos pa an imbestigasyon kan mga otoridad dapit sa nasambitan ng pangyayari.
