NAGA CITY- Irido an tolong persona makalihis na magbaliktad an saindang piglulunadang truck sa barangay Antolon, Caramoan, Camarines Sur.
Binisto an nairido na sinda Aldwin Rodavia, 27-anyos; Gerry Gorobat, 38-anyos asin Ryan Sanchez, 31-anyos.
Sa nakuang impormasyon kan Bombo Radyo Naga, napag-araman na pigbabagtas suboot kan truck na minamaneho ni Rodavia an kalabaan kan tinampo sa nasambitang lugar kan mawaran ini nin kontrol sa minamanehong bihikulo na nagresulta para magbaliktad ini.
Nagsapo nin lugad sa manlaen laeng parte kan saiyang lawas an driver na si Rodavia siring man an duwang pahinante kaini na sinda Gorobat asin Sanchez.
Kargado suboot nin limang drum nin diesel, limang kabaong asin 373 pidaso nin manlaen laeng klase nin softdrinks an nasambitang truck na pasiring kuta na sa banwaan nin Caramoan hale sa ciudad nin Naga.
