NAGA CITY- Irido an tolong persona makalihis an haros magkasunod na aksidente sa tinampo sa banwaan nin Pamplona, Camarines Sur.
Enot na nangyari an aksidente sa barangay San Isidro sa nasambitang banwaan.
Sigon ki PO3 Ryan Sabater, hale sa PNP Pamplona, bigla na sana suboot magbalyo sa tinampo an biktima na si Mariano Callos, 50-anyos kan aksidente ining mabangga kan motorsiklo na minamaneho man ni Joseph Creo.
Sa kusog kan pagkakabangga, nakalasik pa si Callos asin natumba man an driver kan motorsiklo.
Tulos man na pigdalagan sa ospital an duwang indibidwal tanganing maipabulong.
Mientrastanto, makalihis man an sampulong minuto nangyari an saro pang aksidente sa barangay Salvacion sa parehong banwaan.
Nahagop kan pampasaherong Isarog bus na minamaneho ni Rayvin Cañedo, 52-anyos an biktima na si Daniel Basing, 37-anyos.
Nagsapo nin lugad sa saiyang payo asin lawas an biktima na tulos man na pigdalagan sa ospital.
Nagtitinir naman ngonyan sa hepatura kan kapulisan an driver kan bus para sa maninigong disposisyon.
Sa ngonyan, padagos pa an pigkokondusir na imbestigasyon kan mga kapulisan manungod sa nangyaring magkasuway na aksidente.
