Tatlong miyembro ng isang pamilya ang nasawi habang lima ang nakaligtas matapos kumain ng nakalalasong puffer fish o butete sa Barangay Maihao, Cawayan.
Kinilala ng mga awtoridad ang mga nasawi bilang isang 53-anyos na lalaki, kanyang 50-anyos na asawa, at 33-anyos na pamangkin na isang single mother ng apat na anak.
Ayon sa imbestigasyon, binili ng lalaki ang isda mula sa isang mangingisda malapit sa pantalan. Nakasanayan na umano ng pamilya na kainin ang butete, ngunit sa mga nakaraang pagkakataon ay ang lalaki ang naghahanda nito.
Sa insidenteng ito, ang asawa ang nagluto ng isda, na kalaunan ay napag-alamang hindi nalinis nang maayos, dahilan upang manatili ang mapanganib na lason nito. Kinain ng pamilya ang naturang ulam bandang alas-8 ng gabi noong Marso 21.
Ayon kay Barangay Chairman Keen Stanley Ynot, agad na nakaranas ng sintomas ng pagkalason ang mga kumain, kabilang ang pagsusuka.
Limang iba pa—dalawang adulto at tatlong bata—ang kumain ng kaunting bahagi ng isda at agad na naisugod sa ospital. Sa kabutihang palad, sila ay nakarekober matapos maagapan.
“Hindi katulad ng tatlong nasawi na ginawa itong pangunahing ulam sa hapunan,” ani Ynot.
Anim na bata ang naulila dahil sa insidente.
Samantala, muling nagbabala ang Bureau of Fisheries and Aquatic Resources (BFAR) na ang butete ay nagtataglay ng tetrodotoxin, isang lason na umaatake sa nervous system at maaaring magdulot ng kamatayan.
Binigyang-diin ng ahensya na walang antidote laban sa lason ng butete at hindi ito natatanggal kahit sa pamamagitan ng paglilinis o pagluluto.
Sa ilalim ng Fisheries Administrative Order No. 249, mahigpit na ipinagbabawal ang paghuli, pagbebenta, at pagkain ng naturang isda dahil sa matinding panganib nito.
Nagbigay na rin ng tulong ang lokal na pamahalaan sa pamilya ng mga biktima at naghahanda ng ordinansa upang tuluyang ipagbawal ang paghuli at pagbebenta ng butete sa lugar upang maiwasan ang kaparehong trahedya.
