Irido an tulong parasisirang Pilipino kan nakalihis na Biyernes, Disyembre 12 makalihis gamiton kan China Coast Guard asin mga militia ships an water cannons asin maghiro nin agresibo laban sa mga bangkang pangsira kan Pilipinas harani sa Escoda Shoal sa laog kan West Philippine Sea.
Sa sarong pahayag kan Sabado, Disyembre 13 sinaysay kan Philippine Coast Guard (PCG) na poco mas o menos 20 bangkang pangsira kan Pilipinas sa palibot kan Escoda Shoal an “tinarget kan water cannons asin peligruso na blocking maneuvers kan duwang barko kan China Coast Guard (CCG) asin mga kaibang barkong milisa kan China.
Nagluwas an PCG nin mga litrato asin video kan insidente na nagpapahiling kan mga water cannon na nakatutok sa mga bangkang outrigger, asin tubig na nagpapakol sa mga sararadit na bangka.
Pigpahiling man an mga ladawan kan mga indibidwal na nag aako nin atensyon medikal kasunod kan insidente.
Duwang bangkang pangsira kan Pilipinas, sigun sa PCG, an nagsapo kan mahewasang danyos gikan sa mga high-pressure water cannon blasts.
An simbag kan PCG na tabangan an mga parasisirang Pilipino an sinabat kan pagtutol kan saindang mga katapat na Tsino asin mga militia ships alagad sa huri nagtrayumpo sa pagtao nin tabang asin seguridad.
