Gadan an tolong miyembro kan pamilya gikan sa Pilipinas kabali an duwang aki makalihis pagsasaksakon sa Baldwin Park, California.
Pig-arestrar kan mga otoridad an sarong 23-anyos na lalaking suspek, na pinagtutubodang kaparientes kan mga biktima.
Binisto kan Los Angeles County Medical Examiner an mga biktima na sinda Mia Chantelle Narvaez, 8-anyos; Paul Sebastian Manangan, 16-anyos; asin Rona Nate, 44.
Basado sa report, nagsapo nin malalang saksak sa halangkaw na parte kan lawas an tolong biktima. Sigun man sa Los Angeles County Sheriff’s Department, nakaresiber nin disturbance call an Baldwin Park police sa Bogart Avenue kan Disyembre 26 nin pagkabanggi.
Naireport na sarong aking babaye an nagkukurahaw na nagluwas nin harong asin nagpapaapod sa 911 nin huli ta sinaksak kan saindang kuya an saindang ina.
Pigporbaran man kan suspek na magdulag lunad kan behikulo kaini alagad nadakop man.
Komo pagrespeto sa pamilya kan mga biktima, dae pigbuyagyag kan mga otoridad an relasyon sa pag-ultanan kan suspek asin kan mga biktima, alagad kinumpirmar kan mga imbestigador na naka-istar an suspek sa harong kan mga biktima.
