Piglinaw kan National Security Council (NSC) na ordinaryong mamamayan asin bakong ispiya an tolong Pinoy na naireport na pig-arestar sa China.
Sa sarong pahayag, sinaysay ni NSC spokesperson Ass. Director-General Jonathan Malaya na naalarma an ahensiya sa mga kasong pang-iispiya na pig-aakusar kan People’s Republic of China kontra sa 3 Pilipino.
Ipinunto kan NSC official na an 3 Pinoy na inarestar an dating recipients kan Hainan Government Scholarship Program na itinatag sa bisa kan kasunduan sa pag-ultanan kan probinsiya kan Hainan asin Palawan na nagtao nin scholarships sa 50 scholars gikan Palawan tanganing magklase sa Hainan National University.
Tinawan-duon pa kan opisyal na an mga ini an ordinaryong mamamayan na mayong military training na nagpasiring sana sa China huli sa imbitasyon kan gobyerno kan China tanganing duman mag-adal. Siring man an mga ini an nagsunod sa ley asin mayong mga criminal records asin masusing pigsuri kan Chinese government antes na mag-abot sa saindang nasyon.
Pigkuwestyon man kan NSC an pig-apod kaining edited video na iniluwas kan Chinese media na nagpapahiling sa soboot pag-ako kan mga inarestar na Pilipino. Kabali an porsyon kan sinabi kan isa sa mga Pinoy mantang nagpapahayag kan saindang pagbabasol na malinaw na pinapaluwas an China sa positibong pananaw. Sinaysay man digdi an Philippine Intelligence Agency o Philippine Spy Intelligence Service na dae man soboot nagi-exist na ahensiya kan gobyerno. Kaya nagluluwas soboot na scripted an mga pag-ako kan inarestar na mga Pinoy.
Nahihiling man an pag-arestar sa 3 Pinoy komo pagbalos kan China sa mga serye kan lehitimong pag-arestar sa mga Chinese spy asin saindang mga kasabwat digdi sa Pilipinas sa mga nakalihis na bulan.
Katakod kaini, pigsierto kan NSC na saindang pangenot na prayoridad an kasalbadohan asin kapakanan kan mga Pilipinong inarestar. Pigpapadagos kan ahensiya an mahigot na pakikipagtabangang sa Department of Foreign Affairs (DFA) asin Embahada kan Pilipinas sa China tanganing masierto na makakaresiber an mga ini nin kaukulang legal support asin due process sa tahaw kan magabat na akusasyong piggagapo kontra sa sainda.
Pig-enkaminar man kan gobyerno kan PH an Chinese government na respetuhon an mga derichos kan mga inarestar na Pinoy asin tawan nin pagkakataon tanganing malinig an saindang pangaran siring kan pagrespeto sa mga derichos kan mga Chinese national na nasa Pilipinas.
