Piglalaoman kan Department of Tourism (DOT) na mabisita sa nasyon an nasa 30 milyong Pilipino asin dayuhang turista sa mga sikat na tourist destination sa maabot na Holy Week.
Sa sarong pahayag, pigtukoy kan ahensiya na posibleng maging pangenot na destinasyon ngunyan na taon an Cebu, Bohol, Boracay, Palawan, Siargao, Baguio, Batangas, Ilocos Norte, Ilocos Sur, Pampanga, Pangasinan asin Puerto Galera.
Siringman, nahihiling kan kagawaran na dadayuhon kan mas kadakol pang turista an Camiguin, Siquijor, Cagayan de Oro, Davao asin Saranggani.
Mantang sa Maynila na yaon an makasaysayang walled city kan Intramuros, posibleng pumakol sa 2.4 million turista an maikurit sa holy week.
Katakod kan piglalaoman na halangkaw na numero kan mga turistang mabisita sa nasyon, pig-enkaminar ni Tourism Secretary Christina Frasco an mga ini na mag-book sa mga hotel na accredited sa Department of Tourism para sa salbado asin convenient na bakasyon o pagtinir sa nasyon.
Pig-activate na man kan ahensiya an regional operations center kaini tanganig i-monitor an tourism destinations sa nasyon. Pwede man na mag-apod sa DOT Tourist Assistance Call Center na 151-TOUR (151-8687), o mobile number 0954-253-3215 para sa mga turistang mangangaipohan nin tabang.
An call center ay 24/7 na nago-operate asin nagtatao nin multilingual support kabali an Korean asin Mandarin.
