Pigreport kan lokal na gobyerno kan Lungsod Quezon na binaha an nasa 36 sa 142 barangay sa Quezon City kan nakalihis na mga aldaw, makalihis makapagrehistro nin “phenomenal” na pag-uran na nagpakol na sa 141millimeters sa laog sana nin sarong oras.
Duwang tinampo kabali na an Tabing Ilog St. sa Barangay Apolonio Samson asin Daang Tubo sa Barangay UP Campus an nairehistrong lampas-taong baha.
Susog sa Quezon City government, dae na kinaya kan drainage system an matinding bulos kan uran, kaya man nagkaigwa nin labing pagbaha dawa sa mga lugar na dae man pirmeng binabaha.
An dakol kan uran an mas halangkaw pa kumparar sa nairehistro kan nakalihis man na Typhoon Ondoy kan taong 2009.
Sinaysay kan disaster scientist na si Mahar Lagmay na an pag-uran an maikokonsiderar na “extreme” huli ta lampas ini sa 60 mm per hour.
Dugang pa kan lado kan LGU, nakatabang an mga isinasagibong declogging operations tangani orog pang mas maparikas na humupa an baha.
Pighurot man kan syudad an pagpapautob kan saindang Drainage Master Plan (DMP) komo panghaluyang solusyon sa pagbaha. Mientrastanto, kadakol na mga netizens man an nagpahayag nin pagkadismaya asin bumatikos sa mga flood control projects kan gobyerno.
