Nagpromesa si House Majority Leader Ferdinand Alexander “Sandro” Marcos na rerekasan asin hihigotan an disiplina sa Kamara sa liwat na pagbubukas kan sesyon ngunyan na aldaw, Enero 26, 2026.
Target kan mababang kapulungan, sa irarom kan pamamayo ni Speaker Faustino “Bojie” Dy III, na maipasar an natatadang 36 na priority measures gikan sa 48 LEDAC bills kan administrasyong Marcos.
Sigun ki House Majority Leader asin Ilocos Norte Rep. Sandro Marcos, tatawan prayoridad an mga repormang igwang direktang epekto sa pamilyang Pilipino, partikularmente na sa sektor kan agrikultura, salud, edukasyon asin social welfare.
Kaibahan sa mga tututokan iyo an mga amendment o susog sa Rice Tariffication Law, Universal Health Care Act, Pantawid Pamilyang Pilipino Program (4Ps), asin an pagpaparekas kan pagpapatindog kan mga classroom.
Pigtawan-duon man ni Majority leader na sa nakalihis na mga sesyon, nakapasar na an Kamara nin 12 LEDAC measures asin labi 80 iba pang prosopwesto, kaya kampante ining mamamantinir an rekas kan pagtatrabaho para sa kapakanan kan publiko.
Iniluwas man ni Majority Leader Marcos an iba pang importanteng prosopwesto sa irarom kan LEDAC na target tapuson kan Kamara.
Kaibahan digde an Anti-Political Dynasty bill, Party-list System Reform Act, Cybersecurity Act, Right to Information bill, asin an pagbabawal sa mga kaparientes kan opisyal sa mga kontrata kan gobyerno.
Kaibahan man sa listahan an modernisasyon kan Bureau of Immigration, excise tax sa single-use plastics, asin mga ley para sa digital payments asin AI sa eleksiyon.
Pigtawan-duon ni Marcos na tututokan kan Kamara an mahihigot na deadline asin mas marekas na aksiyon tanganing maihatod an mga repormang piglalaoman kan publiko.
