Nasa 38 lugar sa nasyon an pigkonsiderar kan Commission on Elections (Comelec) komo areas of concern na nasa irarom kan ‘red category’ para sa 2025 National and Local Elections (NLE) kawsa naman kan seryosong huma.
Sigun sa Comelec, 32 an makukua sa Bangsamoro Autonomous Region in Muslim Mindanao (BARMM), tig-2 sa Cagayan Valley asin Bicol Region, asin tig-1 sa Western asin Eastern Visayas.
Mientrastanto, igwa man nin 177 areas of concern na nasa orange category; 188 sa yellow; asin 1,239 sa green. Sa irarom kan orange category, 48 lugar an nasa Bicol; 22 sa BARMM; 17 sa Caraga; 16 sa Central Visayas; 15 sa Cagayan Valley; 13 sa Eastern Visayas; 12 sa Mimaropa; 11 sa Soccsksargen; siyam sa Western Visayas; 8 sa Northern Mindanao; tolo sa Zamboanga Peninsula; asin tig-saro sa Central Luzon, Calabarzon asin Cordillera Administrative Region (CAR). Sa irarom kan yellow category, 49 an makukua sa BARMM; 22 sa Northern Mindanao; 19 sa Ilocos; 18 sa Zamboanga Peninsula; tig-13 sa Central Luzon asin Eastern Visayas; 11 sa Caraga; 10 sa CAR; siyam sa Cagayan Valley; tig-pito sa Calabarzon, Western Visayas asin Central Visayas; duwa sa Soccsksargen; asin saro sa Mimaropa.
An mga election areas of concern classification, igwa nin apat na kategorya – green, yellow, orange asin red. An green an nagtutukoy sa mga lugar na mayong security concerns asin generally peaceful asin orderly mantang an mga yellow an igwa nin historya kan election-related incidents sa nakalihis na duwang eleksyon, posibleng may employment nin private armed groups, asin pagkakaigwa nin election-related incidents. An mga nasa orange an mga areas of immediate concern kun saen igw nin seryosong armed threats mantang an mga lugar na nasa red an mga areas of grave concern na may pinagsarong factor sa irarom kan yellow category asin serious armed threats.
Pigkokonsiderar sinda kan poll body na maisairarom sa Comelec Control. Sigun ki Comelec spokesperson John Rex Laudiangco, an mga nasambitan ng lugar an premirong pig-rekomendar kan PNP asin AFP na maibali sa areas of concern, asin pig-aprubaran kan Comelec en banc.
