NAGA CITY- Gadan an apat katawo na pinagtutubudang miembros kan mga rebeldeng New People’s Army (NPA) makalihis makabakbakan kan mga ini an tropa kan 83rd Infantry Battalion (IB) sa boundary kan mga banwaan nin Bato asin Balatan sa probinsya nin Camarines Sur.
Sa intrevista kan Bombo Radyo Naga ki Capt. Joash Pramis, chief kan Division of Public Affairs Office (DPAO) kan 9th Infantry Division, Philippine Army, sinaysay kaini na hasta sa ngonian, nagpapadagos pa an pigigibong clearing operations kan mga otoridad sa nasambitang lugar kun sain nangyari an engkwentro.
Segun ki Pramis, alas 6:45 kasubagong aga kan magka-engkwentro an militar asin mga miembros kan Bicol Regional Party Committee (BRPC) na napuli sa nagkapirang minutong ribayan nin putok.
Tulos suboot nagdulag an mga rebelde kun sain nawalat sa lugar kan pinangyarihan an bangkay kan apat na pinagtutubudang miembros kan mga ini.
Apwera digdi, tulong high powered firearms man suboot nakumpiskar kan mga otoridad.
Mientrastanto, segun ki Pramis, mayo man nin nairehistrong casualty sa lado kan tropa kan gobyerno mantang padagos pang pig-aaram kun apwera sa mga nagadan, igwa pang ibang irido sa linyada kan NPA.
