NAGA CITY- Kinumpirmar ngonyan kan manhamiento kan 9th Infantry Division, Philippine Army na igwang apat na mga soldados kabale na an duwang opisyal na hale sa 49th Infantry Batallion an nairido makalihis an nangyaring bakbakan sa parte kan Marawi City subanggi.
Sa entrevista kan Bombo Radyo Naga ki Capt. Randy Llunar, chief kan Division of Publis Affairs Office (DPAO), sinaysay kaini na nagkokondusir nin combat operations sa barangay Mapandi an tropa kan 49th IB kan makabakbakan kaini an pigkakarkulong 30 mga miyembro kan local terrorist group.
Sigon ki Llunar, naibalyo na sa mas salbadong lugar an apat na dae pa pinapangaranang mga soldados kabale na an duwang opisyal kan militar na nairido sa nasambitang engkwentro.
An tropa kan 49th Infantry Batallion na hale sa rehiyong Bicol na ipinadara sa parte kan Mindanao kan bulan nin Setyembre taong 2016.
Apwera sa nasambitang batalyon, ipinadara man sa parte kan Mindanao an mga Bicolanong soldados hale sa linyada kan 42nd IB asin 65th IB.
Mientrastanto, padagos man an pagtataong pagirumdom kan mga militar sa publiko na magtinir na alertado asin ipaabot tulos sa mga otoridad kun makakalihing nin kaduda-dudang mga tao asin bagay sa saindang mga lugar.
