Apat pang ibang foreign-drug trafficking groups an sangkot suboot sa ilegal na kalakalan nin droga sa nasyon, base sa impormasyon na nagluwas makalihis an briefing kan House Committee on Dangerous Drugs.
Base sa impormasyon sa ginibong pagdangog kan House Committee on Dangerous Drugs na pinamamayuhan ni Las Piñas Lone District Rep. Mark Anthony Santos, ini konektado sa tangkang paglaog sa Pilipinas hale sa Laos nin sinasabing shabu na nagkakantidad P3.4 bilyon gamit an sarong pribadong jet.
Segun sa sarong halangkaw na opisyal kan pulisya na nakaulay ni Santos matapos an briefing sa Kongreso, kaiba sa mga dayuhang grupong sinasabing konektado sa ilegal na kalakalan nin droga sa nasyon an mga grupong Chinese asin Chinese-Filipino, West African drug-trafficking networks asin an Mexican criminal organizations kaiba an Sinaloa Cartel, dugang pa ini sa Sam Gor transnational drug syndicate.
Sa impormasyon na nakua ni Rep. Santos, kaiba sa mga grupong dating konektado kan mga awtoridad sa transnational drug trafficking an United Bamboo Gang, 14K Triad asin Dragon Wu International Drug Syndicate.
Mantang, ibinareta man ni PDEA Director General Isagani Nerez na igwang alyansa an Sam Gor sa limang triad groups, kaiba an 14K Triad, Bamboo Union, Big Circle Gang, Sun Yee On asin Wo Shing Wo.
Tinantyang 40 sagkod 70 porsiyento suboot kan merkado nin methamphetamine sa rehiyon an kontrolado kan Sam Gor, na sinasabing nagkakakita nin labi sa US$17 bilyon kada taon.
Segun ki Santos, kaipuhan na imbestigaran an posibleng koneksyon kan mga dayuhang sindikato sa Pilipinas, kaiba an saindang pinansyal na suporta asin an mga paagi na ginagamit sa pagpuslit nin ilegal na droga.
Padagos man na iniimbestigaran kan komite an tangkang paglaog nin shabu hale sa Laos tanganing matukoy an mga posibleng imbwelto asin matukoy kun kaipuhan an mga bagong lakdang sa ley kontra sa transnational drug trafficking.
