NAGA CITY– Irido an apat na katao kabale na an duwang mga aki makalihis na mabanggaan nin sarong kotse sa banwaan kan Sta. Elena, Camarines Norte.
Binisto an mga biktima na sinda Marita Pregonero, 69-anyos, Analiza Lomentigar, 41-anyos asin an duwang aki na may edad duwa asin sarong taon.
Sa nakuang impormasyon kan Bombo Radyo Naga, napag-araman na binabagtas kan mitsubishi adventure na minamaneho ni Ruben Danao Jr., 37-anyos an kalabaan kan tinampo sa Barangay Bulala pasiring kudta na sa Metro Manila.
Bigla na sanang nagbalyo sa tinampo an mga biktima kaya aksidente ining nabanggaan kan nasambitan nang lunadan.
Nairido an lawas kan apat na biktima asin tolos naman na pigdalagan sa ospital tanganing mapabolong.
Kontemporaryong nasa kustodiya kan PNP Sta Elena an driver na si Danao asin napag-araman na nagkauyon na sana an duwang kampo makalihis an insidente.
