NAGA CITY- Target kan Southern Luzon Command (SolCom) na mawakasan na an saindang laban kontra sa mga teroristang New People’s Army (NPA) ngonian na taon.
Sa entrevista kan Bombo Radyo Naga ki Col. Teody Toribio, tagapagataram kan SolCom, sinaysay kaini na nakalatag na an saindang mga estratehiya na gagamiton laban sa NPA.
Segun ki Toribio, makulog man sa saindang boot na kapwa mga Pinoy an nagagadan sa mga labanan alagad kun an mga ini soboot an makakaraot sa sosyudad dae sinda maduwa-duwang labanan an mga ini.
Pig-orgulyo man kan opisyal na basado sa saindang record kan 2017, maabot sa 52 NPA an nagadan sa mga engkwentro, 18 an nadakop mantang 57 an nagsuko.
Sa first quarter man suboot kan taong 2018, mayo pang naii-rehistrong binawian nin buhay sa mga soldados mantang duwa nang miembros kan NPA an nagadan.
Segun ki Toribio, dawa mas magigin mainit an saindang operasyon, laoman soboot kan publiko na dae mabalgar sa diretsos humanos an mga kasuldadusan.
Dugang pa ni Toribio, parte kan saindang mas pinapusog na tactical operation kontra sa nasabing pigkokonsidirar na teroristang grupo ang pahayag ni Presidente Rodrigo Duterte na kaipuhan kan mga soldados na makagadan nin limang NPA kada aldaw.
Kun babalikan, simbag ini kan presidente sa huma ni Communist Party of the Philippines (CPP) founder Joma Sison na manggagadan nin sarong soldados kada aldaw kun dae ipagpapadagos kan gobyerno an peace negotiations.
