Dae mababa sa 44 katawo an nagadan makalihis tumaob an sarong overloaded ferry sa Lake Kariba sa Zimbabwe.
Segun sa Civil Protection Unit, may sakay na 114 adult passengers, limang crew member asin dae pa maaraman an komo kan mga aki sa ferry kan mangyari an insidente kan Martes.
Napag-araman na may kapasidad sana nin 90 pasahero an ferry.
Enot nang nairehistro kan mga awtoridad an 77 katawo an naisalbar asin 15 bangkay an narekober.
Sa huri, itinaas kan Zimbabwe Republic Police an death toll sa 44 mantang nagpapadagos an search and rescue operation.
Segun sa saro na saksi, bumiyahe an ferry sa ibong kan maraot na panahon asin posibleng tinamaan nin makusog na alon na naging kawsa tanganing tumaob ini.
Tulos na rumesponde an mga kataid na bangka, mantang nagtabang man an mga diver, mas darakulang pandagat, militar asin helicopter hasta sa sarong national park.
Sinabi kan saksi na pirang hawak an nahiling sa tubig mantang isinasagibo an rescue operation.
Dinara man an mga nasalbar na pasahero sa Long Island, sarong lugar na makukua sa tahaw kan Lake Kariba.
Duwang funeral parlor na man an inatasang mangolekta nin mga narekober na bangkay mantang nagpapadagos an paghahanap sa mga nawawara.
Ang Lake Kariba an nasa border kan Zimbabwe asin Zambia asin ipigtuturing na pinakadakulang artificial lake sa mundo.
