Salbado na an gabos na 44 na mga aki matapos na pagbabadilon asin gadanon kan sarong pulis an saiyang agom na paratukdo sa sarong kindergarten sa probinsya nin Chonburi, Thailand, kan Miyerkules.
Segun sa mga awtoridad, ligtas nang naka-ebakwar an mga kaakian kaiba an tolong paratukdo asin tolong staff kan eskwelahan makalihis an insidente sa Nong Pla Lai Municipal Kindergarten sa distrito nin Bang Lamung.
Segun sa report kan AFP, nag-abot sa eskwelahan an suspechado na sarong pulis asin kinaulay an saiyang agom antes binadil. Dai nasaksihan kan mga aki an pambabadil huli ta nangyari ini sa luwas kan klasrum.
Makalihis an insidente, nagpuli na an suspek kun sain pinalibutan ini kan mga pulis asin pig-enkaminar na magsuko na.
Mientrastanto, ipinagboot kan gobernador an temporaryong pagsara kan kindergarten asin an pagtao nin psychological support sa mga aki asin staff na apektado kan insidente. Dai pa malinaw an motibo sa pambabadil.
