NAGA CITY- Pig-aandam na suboot kan Philippine Army an maninigong mga kaso na posibleng isangat kontra sa pigtutubudang miembro kan rebeldeng New People’s Army (NPA) na yaon sa likod kan pananambang sa sarong miyembro kan Civilian Armed Forces Geographical Units (CAFGU) na nangyari sa banwaan nin Del Gallego, Camarines Sur.
Sa entrevista kan Bombo Radyo Naga ki Capt. Joash Pramis, Division of Public Affairs Office (DPAO) chief, 9th Infantry Division, Philippine Army, sinaysay kaini na nakikipagkoordinar na sinda sa hepatura kan pulisya sa nasambitang banwaan tangani na mapakarhay na an maninigong kaso kontra sa pinagtutubudang miembro kan rebeldeng grupo na suspek sa pambabadil ki Jaime San Juan, 56-anyos.
Dugang pa ni Pramis, inaandam naman kan 22nd Infantry Battalion an tabang asin benepisyo na pwedeng maitao sa nabayaan na pamilya ni San Juan.
Enot kaini, kinondenar ni Pramis an ginibong pananambang kan mga rebelde ki San Juan asin sa kaibanan kaining saro pang CAFGU na nangyari mantang pabalik na sinda sa saindang patrol base sa Barangay Mabini makalihis magkarigos asin magsakdo nin tubig.
Mahigot man an ginigibong pagbabantay kan Philippine Army sa lugar tangani na masiertong mapupugulan an posibleng pag-atake kan mga rebelde katakod kan saindang paparaning anibersaryo sa Marso 29.
Marurumduman na pigsierto kan 9ID na gigibuhon ninda an gabos tangani na matawan hustisya an pagkagadan kan nasambitang CAFGU.
