(UPDATE) NAGA CITY- Kinumpirmar mismo kan tagapagtaram kan PNP Sto Tomas sa probinsya nin Batangas na presenteng nakakarsel sa saindang hepatura an dating konsehal asin esposa kaini na imbwelto sa kasong estafa sa Camarines Sur.
Sa ekslusibong pakikipag-olay kan Bombo Radyo Naga ki PS/Insp. Erickson Go, tagapagtaram kan PNP Sto Tomas, sinaysay kaini na kan Oktubre, 2016 pa kan punan nindang bantayan si Nestor Avenido asin an esposa kaini.
Isinerbe kan saindang hepatura an arrest warrant laban sa mag-agom na parehong nahahampang sa kasong syndicated estafa asin mayong inirerekomendar na pyansa.
Pigsierto man ni Go na yaon sa marhay na kamugtakan ngonyan an mag-agom na Avenido.
Mientrastanto, sa suway na entrevista ki PC/Insp. Ronnie Fabia, chief kan Criminal Investigation and Detection Group (CIDG) Camarines Sur, sinaysay kaini na naiserbe na sa mag-agom na Avenido an 47 mga arrest warrant laban sa sainda.
Nilalaoman man na atyan na hapon maabot na sa probinsya nin Camarines Sur an mag-agom na Avenido para sa saindang kinakahampang na kaso.
Marurumduman kan nakaaging Abril 15 kan maarestar an mag-agom na Avenido sa probinsya nin Batangas makalihis an halawig na panahon na pagtatago sa mga otoridad.
