NAGA CITY- Nagtitinir na sa kostudiya kan mga otoridad an limang mga miyembros suboot kan New People’s Army (NPA) na naarestar kan mga kabuhan kan 9th Infantry Division, Philippine Army makalihis an nangyaring bakbakan sa banwaan nin Bato, Camarines Sur subagong aga.
Sa entrevista kan Bombo Radyo Naga ki Capt. Joash Pramis, chief kan Division of Public Affairs Office (DPAO) kan 9ID, sinaysay kaini na na-i-turn over na kan mga soldados sa hepatura kan PNP Bato an limang mga rebelde na naarestar makalihis an bakbakan na nangyari sa barangay Payak, bandang alas 6 nin pagkaaga.
Sigon ki Pramis, tulos man na pigtawan nin maninigong medikal na atensyon an duwang mga rebelde na nairido makalihis an nasambitang bakbakan.
Kinumpirmar man ni Pramis na magkaibang grupo an enot nang nakaengkwentro kan mga soldados sa banwaan nin Lagonoy suodma asin an mga nakabakbakan kaini subagong aga.
Katakod kaini, pigsierto kan opisyal an mas pinahigot na operasyon kan mga militar para lapagon an mga nagdurulag na miyembros kan rebeldeng grupo.
Marurumduman na apat na mga NPA suboot an binawian nin buhay sa haros magkasunod na bakbakan sa banwaan nin Bato asin Lagonoy asin nakumpiskar sa mga ini an mga high powered firearms.
Sa ngunian, padagos pa na inaaram kan mga otoridad an pagkakabistuhan kan nagadan na mga rebelde.
