NAGA CITY- Arestado sa magkakasunod na operasyon kan Philippine Drug Enforcement Agency (PDEA) an limang drug personality kabale an sarong High Value Target (HVT) sa Camarines Provinces subagong matanga.
Enot kaini, alas-10:30 subanggi kan madakop an pigkokonsiderar komo High Value Target (HVT) na si Expedito Buñag alyas “Atong” sa Barangay 4, Daet, Camarines Norte mantang arestado man an sarong Jurhel Balane sa Barangay Burabod sa parehong banwaan.
Napag-araman na apwera sa pagigin HVT ni Buñag, miembro man suboot ini kan Kaka Malonso Drug Group sa nasambitang lugar.
Mientrastanto, pasado alas 12:50 man nin mg-uumagahon kan madakop man kan PDEA an tolong suboot mga drug personality sa San Jose, Milaor, Camarines Sur.
Binisto an mga suspek na sinda Ernie Atchero, Ruel Ibarreta asin Dante Badong.
Narekober sa mga ini an duwang medium sachet asin saro pang sadit na sachet kan pigtutubudang shabu na nagkakantidad nin labi sa P14,000.
Sa ngonyan, nagtitinir na sa kustodiya kan mga otoridad an nasambitang mga suspek para sa maninigong disposisyon.
