(UPDATE) NAGA CITY- Kinumpirmar ngonyan kan Philippine National Police (PNP) na apwera sa nagadan na rank number 2 drug personality sa cuidad nin Lucena, target mn kuta na kan saindang anti-illegal drug operation subagong mag-uumagahon an ama kan nasambitang suspek.
Ini an sinaysay ni P/Supt. Romulo Albacea, hepe kan Lucena City PNP sa entrevista kan Bombo Radyo Naga.
Sigon ki Albacea, apwera sa nagadan na suspek na binistong si Dom Ibañez sa pigkondusir na buy bust operation subagong alas-4:15 nin mag-uumagahon sa barangay Cotta, target man kuta na kan saindang operasyon an mismong ama kaini na pigkokonsiderar na rank number 1 man sa drug watchlisted personality kan PNP.
Haros magkataid sana suboot an harong kan duwang mga suspek kaya posibleng natanugan kan ama ni Dom an presensya kan mga operatiba kaya mariks ining nakadulag.
Likay man si Albacea na idetalye pa an pagkakabistado kan ama ni Ibañez para dae suboot ini makaapektar sa pigkokondusir na follow up operation kan PNP.
Susog sa opisyal, haloy nang pigrereklamo kan nagkapirang mga residente kan barangay Cotta asin kataid na barangay 10 an nasambitang mag-ama huli sa saindang iligal na transaksyon.
Dae man pighahale kan PNP an posibilidad na kinukua ni Dom sa saiyang ama an droga na pigpapabakal kaini urog pa ta bistado suboot ining supplier nin droga sa saindang barangay mantang pig-iimbestigaran pa ngonyan kan pulisya kun saen posibleng kinukua kan nakadulag na suspetsado an pigpapangalad na bulong na pigsu-supply kaini.
Napag-araman man na apwera sa pagkakaimbwelto sa iligal na droga, nahahampang man an ama ni Dom sa tolong counts nin kasong rape.
Marurumduman na binawian nin buhay an suspek na si Ibañez makalihis na mapuli sa ‘running gun battle’ o ralapagan an buy bust operation na pigkondusir subagong aga kun saen nag-abot pa sinda sa kataid barangay 10.
Nagsapo nin lugad sa saiyang lawas an suspek na nagresulta sa tulos kaining kagadanan asin narekober sa pinangyarihan kan insidente an sarong cal. 38 na badil, basyo asin mga bala, mga drug paraphernalia asin tolong sachet na naglalaog nin pigtutubudang shabu.
Basado sa datos kan PNP Lucena City, nagsuko naman suboot sa Oplan Tokhang an suspek na si Ibañez alagad nag-untok na suboot ini sa pagpartisipar sa Simula ng Pagbabago (SIPAG) na programa kan PNP asin nagbalik liwat sa saiyang iligal na gibo.
