Inihayag kan Department of Public Works and Highways (DPWH) na may 5,700 pang flood control projects an presenteng tinatapos ngunyan na taon, apwera pa ini sa mga nakalinyang flood control initiatives para sa taong 2026.
Kaiba man igde an mga river dike, flood walls, drainage systems, asin pumping stations.
Pigsierto ni DPWH Secretary Manuel Bonoan na an mga proyektong ini an nakatuon sa panghaluyang solusyon na makakatabang bako sana sa kasalbaduhan kan mga residente, kundi pati sa paglago kan ekonomiya asin preparasyon kan nasyon laban sa sakuna.
Katakod kaini, sinabi man ni Bonoan na bagaman may mga ginigibo pang proyekto para sa baha, nasa 9,856 flood control projects man an nakumpleto na gikan Hulyo 2022 hasta sa Mayo 2025 na presenteng ginagamit ngunyan.
Dakula an naitabang kan mga ini sa pagbawas kan pagbaha, orog na sa mga hababang lugar na dating pirmeng lubog sa tubig.
Mientrastanto, nahihiling man kan kagawaran na kinakaipuhan nang i-modernize an mga drainage system sa Metro Manila tangani mabawasan an danyos an kawsa kan makukusog na pag-uran.
Sigun pa ki Bonoan, bagaman gumagana an mga pumping station, limitado an saindang bisa huli ta barado asin pano na nin putik an mga lumang drainage system.
Basado sa huring pagsusuri kan ahensya, pigkakarkulong 70 porsyento nin drainage system sa Metro Manila an silted o pano na kan sediment.
Huli man digde, nagpepreparar an kagawaran nin bagong plano para sa mas modernong drainage system, katabang an World Bank, tangani simbagan an naglalalang problema sa baha.
