NAGA CITY- Pinalibre na kan pigtutubudang mga rebeldeng New People’s Army (NPA) an anom na persona na pighostage suboot kan mga ini hale sa sarong rancho sa banwaan nin San Francisco, Quezon.
Sa nakuang impormasyon kan Bombo Radyo Naga, napag-araman na hale ki Capt. Patrick Jay Retumban, pamayo kan Division of Public Affairs Office (DPAO) kan 2nd Infantry Division, Philippine Army, dinara suboot sa pwersang lugar an mga pighostage na indibidwal alagad tulos man an mga ining pinalibre makalihis an nagkapirang oras.
Dawa nakapuli na suboot sa saindang mga harong an anom na mga biktima kabale na an duwang naka-off duty na miyembro kan CAFGU alagad nakaka-eksperyensya pa nanggad suboot an mga ini nin trauma asin labing pighahandalan an para sa pagiging salbado kan saindang buhay asin pamilya.
Sa suway man na entrevista ki Col. Teody Toribio, tagapagtaram kan Southern Luzon Command (Solcom), posibleng obheto subot kan pag-atake kan mga rebelde sa nasambitang rancho na maenkaminar an mga residente na magbale sa makakawalang grupo.
Marurumduman na pig-atake kan pigkakarkulong 50 armadong kalalakihan an rancho na pagsasadiri kan sarong James Murray sa barangay Sitio Tumabaga, Nasalaan sa nasambitang banwaan asin kinua pa kan mga ini an nagkakapirang mga importanteng gamit asin pigraot pa suboot an ibang mga ekipahe digdi.
