Pigpreparar kan Department of Agriculture (DA) an posibleng pagpapalawig kan 60-day rice import ban asin paglangkaw kan taripa tangani suportaran an mga lokal na paraoma kan paroy, sigun ki Secretary Francisco Tiu Laurel Jr. kan nakalihis na Miyerkoles.
Inatasan ni Presidente Ferdinand Marcos Jr. an DA na magpepreparar kan mga kaukulang sugo. Nagpuon an suspensyon kan nakalihis na Setyembre 1 asin matatapos sa Nobyembre.
Sa ngunyan, nasa 15 porsyento an taripa sa imported rice. Mawot ni Presidente na maglangkaw an presyo kan paroy sa mas reasonable levels, sigun pa ki Tiu Laurel, na target an ₱16 hasta ₱17 kada kilo kumparar sa presenteng presyo na ₱8 hasta ₱12 sa nagkapirang lugar.
Dae binanggit an eksaktong laba kan posibleng extension, huli ta posibleng magkawsa ini nin “hedging” sa mga trader.
Final decision dapit sa laba kan ban asin taripa an iluluwas makalihis makakua nin mas kumpletong datos, na posibleng ianunsyar pag abot kan katahawan kan Oktubre.
Padagos man na pinag-uulayan kan economic team an.posibilidad na ibalik an dating 35 porsyento na taripa.
Naenot ng pigsuhestyon kan DA an padikit-dikit na paglangkaw sa 25 porsyento gikan sa presenteng 15, alagad paramientras ipinagpapauktaba ini.
