Nasa 1,049 indibidwal gikan sa manlaen-laen na nasyon, kaiba an 66 Filipino an matrayumpo na nakabalyo sa Myanmar-Thailand border makalihis makatakas sa KK Park scam compound sa Myawaddy Township, Myanmar.
An pagtakas an nangyari kasabay kan nagpapadagos na rescue operations na inilunsar kan Myanmar military kontra sa mga scam hub na pinatatakbo kan Chinese mafia networks.
Kadaklan sa mga naisalbar o nakatakas na human trafficking victims (HTVs), partikularmente iyo an mga Filipino, an tinabangan kan armed groups siring kan Democratic Karen Benevolent Army (DKBA) asin Border Guard Force (BGF), asin an iba an itinurn-over sa Karen National Union (KNU) antes na pigbalyo sa Moei River pasiring sa Mae Sot District, sarong Thai border town.
Sa report, an grupo an binibilog kan 913 lalaki asin 136 babae gikan sa 26 na nasyon kaiba an India (399), China (147), Vietnam (138), Ethiopia (94), the Philippines (66), Pakistan (43), Thailand (31), asin Indonesia (27).
Sa mga nakalaog sa Thailand, duwa an presenteng naka-detain sa Mae Sot Police Station, 200 sa Border Patrol Police Unit 346, 593 sa Thai–Myanmar Friendship Bridge No. 2, mantang an 254 iba pa an presenteng nagbabiyahe.
Sigun sa mga awtoridad, an gabos na naisalbar an sasairarom sa National Referral Mechanism (NRM) process tanganing tukuyon kun sinda an mga biktima kan human trafficking o kasabwat sa illegal na aktibidad.
Marurumduman na kan nakalihis na Biyernes nin pagkabanggi, Oktubre 24 nagpuon na an Myanmar military na bombahon an pirang establisyemento na ginagamit komo scam center sa KK Park.
Sa kaparehong panahon, napabareta man na pinutol kan SpaceX, kompanyang pagsasadiri ni Elon Musk, an serbisyo kan labi sa 2,500 Starlink devices na ginagamit kan mga sindikato sa laog kan scam hub
