Maduon na pinahimutikan ni Tingog Party-list Rep. Jude Acidre an mga akusasyon na nagkokonektar sa anuman na anomaliya kan dating House Speaker asin Leyte Representative na si Martin Romualdez makalihis na pigklaro kan Independent Commission for Infrastructure (ICI) na mayo sindang nakuang basehan para i-pressure an mambabatas.
Sigon ki Acidre, an mismong referral na pinirmahan kan retiradong Supreme Court Justice na si Andres Reyes nagsasabi na mayong “finding or conclusion of guilt” laban ki Romualdez, kontra sa ipinaribot na report ni Navotas Rep. Toby Tiangco.
Si Acidre nagbalos man sa Tiangco huli sa soboot pagpalakop nin salang impormasyon na ginamit an pondo nin ayuda arog kan AICS, AKAP, asin TUPAD tanganing “suhulan” an mga mambabatas na nagpirma sa impeachment complaint laban ki Bise Presidente Sara Duterte.Nanindugan si Acidre na seryosong evidencia asin bakong “chismis” an kaipuhan para sa siring na mga akusasyon, kasabay kan pag-agyat ki Tiangco na ngaranan an mga suboot nasuhulan asin magsangat nin reklamo sa irarom kan sinumpaan na pahayag.
Nanindugan an mambabatas na an pagpirma sa impeachment nakabase sa mga dokumento asin testimonya, asin bako huli sa anuman na promesa nin mga proyekto o pondo.
Nagpatanid si Acidre na may katuyuhan sana an pagpalakop nin disinformation na raoton an integridad kan Kamara asin hinagad kaini na mapundo na an paggibo nin mga istoryang mayong solidong pruweba.
