Hinagad kan mga piskal hale sa Office of the Ombudsman sa Sandiganbayan Third Division na baliktadon an desisyon na nagtao nin piyansa ki dating Senador Ramon “Bong” Revilla Jr.
Sa saindang Motion for Reconsideration na isinangat kan Miyerkules, sinabi kan piskalya na an desisyon kan korte na an mga “commitments” o kickbacks na soboot naresibe ni Revilla bakong public funds bakong supisyenteng basehan tanganing ma-exonerate ini sa liability sa soboot conspiracy na misappropriate an P76.9 million na pondo kan gobyerno.
Nag-insistir an piskalya na dai nanggad ninda sinabi na an mga kickback na naresibe ni Revilla iyo an aktuwal na pondo na pig-misappropriate. Sinabi ninda na an soboot pag-ako kan dating senador nin advance kickbacks sarong indikasyon kan saiyang kooperasyon sa plano na i-divert an pondo kan gobyerno.
Sinabi man kan Ombudsman na nagtabang suboot si Revilla na maibali an kontrobersyal na proyekto sa appropriations bill asin sa 2025 General Appropriations Act.
Segun sa piskalya, dawa ngani dae direktang nag-embezzle nin pondo si Revilla, nagtugot suboot ini o nagtugot sa saiyang kaibahan na akusado na isagibo an soboot pag-embezzle kan pondo kan gobyerno.
Pig-assert man kan Ombudsman na may mga nawawarang dokumento asin misrepresentation sa mga papeles na ginamit bilang basehan sa pag-release kan fondo, kabali na an report na haros 95 por ciento nang tapos an proyecto dawa mayo man suboot nin aktwal na construction na ginibo sa lugar.
An prosekusyon pigkwestyon man an konklusyon kan Ikatolong Division na kulang an direktang ebidensya laban ki Revilla, asin pig-asegurar na an direktang patunay dai kaipuhan tanganing patunayan an pagsasabwatan sa irarom kan Jurisprudence.
Marurumduman na temporaryong pinaluwas si Revilla kan Hulyo 31 makalihis na magdesisyon an mayorya kan Sandiganbayan Third Division na kulang an ebidensya laban sa dating senador.
Mientrastanto, nagsangat man nin Motion for Reconsideration an kairibang akusado ni Revilla na dating Department of Public Works and Highways (DPWH) Bulacan First District Engineer Jaypee Mendoza asin cashier Christina Pineda makalihis na isikwal kan korte an saindang kahagadan nin piyansa.
Segun sa Third Division Clerk of Court Atty. Dennis Pulma, tinawan nin limang aldaw an piskalya asin depensa tanganing magsumiter kan saindang mga komento sa mga pigsangat na mosyon.
