Kaso kan Ebola sa Congo, labi na sa 4,000
Nagpakol na sa labi 4,000 an kumpirmadong kaso kan Ebola sa Democratic Republic of Congo o DRC, sigun sa pinakahuring datos kan gobyerno.
Nag-abot na sa 4,053 an total na kaso, kabali an 1,850 na binawian nin buhay. Ini na an ikaduwang pinakadakul na Ebola outbreak sa bilog na kinaban asin kinukonsiderar man na pinakamarikas na paglakop sa kasaysayan.
Sigun sa mga eksperto, posibleng nagpoon an paglakop kan virus bago pa idineklarar an outbreak kan Mayo 15, kaya posibleng mas dakol pa an totoong bilang kan mga naulakitan kan helang.
Nairekord an mga kaso sa limang probinsya kabali digdi an Ituri, North Kivu, South Kivu, Haut-Uele, asin Tshopo.
Base sa report kan journal Science, posibleng nagpoon an outbreak kan Enero o mas amay pa sa Ituri, kun sain labi 500 an mga pinagtutubudan na kaso na natuklasan bago an opisyal na deklarasyon.
Sigun sa mga eksperto, an naantalang pagtukoy sa helang kulang na surveillance, armadong labanan, kakulangan nin bakuna asin medisina an mga rason kun tano ta nadipisilan na mapugulan an paglakop kan Ebola.
An Ebola outbreak sana sa West Africa kan 2014 hasta 2016, na may labi sa 28,000 na kaso, an mas kadakol kumpara sa presenteng outbreak sa Congo.
