Aram baya nindo mga ka-Bombo, sarong 75-anyos na lolo sa China an piniling iwalat an misis huli man sa AI.
Sigun sa report, an nasambitan ng lalaki na binisto sa apelyidong Jiang, an labi na nahumaling sa sarong babaing avatar na nahiling kaini sa social media.
Bagaman risang AI sana ini para sa mga nakatuod sa teknolohiya, napatubod si Jiang na saro ining tunay na babae.
Kun saen, nag abot na sa puntong uru-aldaw, pig aabangan kaini an mensahe gikan sa AI avatar, na nagin kawsa man kan saiyang madalas na pagtutok sa cellphone.
Hasta sa mag abot an aldaw na sinaway na ini kan saiyang misis, alagad imbis na mag untok, pinili pa na makipagdiborsyo ni Jiang tangani maitao an saiyang bilog na atensiyon sa saiyang “online girlfriend”.
Sa huri, an mga aki ni Jiang an kumumbinsi sa saiya asin man ipinaliwanag na an babaing saiyang namumutan an bakong totoong tao asin gibo sana kan AI.
An kaso ni Jiang an nagtaong-pansin sa sarong nagdadakulang problema sa China kun saen an mga gurang, orog na an mga namumundong tao an nagigin biktima kan mga makatotohanang AI-generated content.
An mga avatar na ini an ginagamit bako sana tangani magpabakal nin mga produkto, kundi man tangani mag kriar nin “emotional dependence” sa mga paradalan.
Huli man digde, nagpagirumdom man an mga eksperto sa mga pamilya na bantayan an online activity kan saindang mga may edad ng kaparientes, orog na kun labi na an saindang paggamit nin gadgets.
