Nagpakol na sa 8 an binawian nin buhay sa landslide sa Barangay Guisad Surong sa Baguio City, segun yan sa Baguio City Public Information Office.
Segun sa pinakahuring report kan City PIO alas-7 nin banggi, 8 na an kumpirmadong gadan, mantang 3 an padagos na nawawara.
Duwa man an nailigtas, mantang saro sa tolong survivor na enot na dinara sa ospital an ipigreport na nagadan dahil sa mga tinamong pinsala.
Nailigtas man kan mga rescuer an sarong ido gikan sa landslide area. Padagos an Search, Rescue and Retrieval Operations sa lugar mantang hinahanap kan mga awtoridad an mga tawong dai pa nanunutaran.
Nangyari an landslide bandang alas-7 nin bangui kan nakalihis na Domingo, kasabay kan padagos na makusog napag-uran sa syudad. Tolong harong an tinamaan kan pagguho kan daga asin naapektuhan an limang pamilya.
Segun ki Baguio City Mayor Benjamin Magalong, inilikas na an mga residente na haraní sa mga lugar na itinuturing na harani sa peligro sa landslide.
Mientrastanto, sinabi kan alkalde na nakapagrehistro na man nin 13 iba pang landslide sa manlaen-laen na parte kan Baguio City huli sa padagos na pag-uran.
Huli kaini, nag-abot na sa 14 an kabuuang bilang kan mga insidente nin landslide na naitala sa cuiddad. Nagpatanid si Magalong na puwede pang madugangan an mga insidente huli sa padagos pa an maraot na panahon.
