Posibleng magdeklarar kan dengue outbreak an nasa 8 pang lugar sa nasyon sa tahaw kan paglangkaw kan mga kaso sa mga nakalihis na semana sigun sa Department of Health (DOH).
Naenot nang nagdeklarar kan nakalihis na Sabado an Quezon City kan dengue outbreak makalihis maglobo an numero kan mga pigdadapuan kan helang asin nagkitil na nin 10 katawo ngunyan na taon kun saen kaibahan sa binawian nin buhay an 8 menor de edad.
Mientrastanto, dae man pigtukoy ni Health spokesperson ASec. Albert Domingo an 8 pang lugar na nakatalaang magdeklarar kan dengue outbreak alagad an mga ini soboot an nasa Metro Manila, Central Luzon asin CALABARZON.
Sa datos kan DOH, naobserbaran an paglangkaw kan kaso kan dengue sa bilog na nasyon ngunyan na taon na naa 28, 234 case sa data kan nakalihis na Pebrero 1, ini an 40% na paglangkaw gikan sa parehong panahon kan nakalihis na 2024.
Paliwanag ni ASec. Domingo na maski mayong uran sa mga nakalihis na aldaw, an mga stagnant water na natipon sa mga nakalihis na weather system an pinag-iistaran kan mga lamok na nagdadara nin helang na dengue.
Kaya tanganing malikayan an helang, kaipuhan linigan an palibot asin halion an mga stagnant na tubig, maggamit nin mosquito repellent asin magsulot nin mga bado na igwang halabang manggas asin pantalon.
