(UPDATE) NAGA CITY- Irido an walong persona kabale na an tolong mga sibilyan sa nangyaring pananambang kan mga pigtutubudang rebeldeng New People’s Army (NPA) na inaapod man ni presidente Rodrigo Duterte na teroristang grupo na nangyari sa General Luna, Quezon province subanggong aga.
Sa nakuang impormasyon kan Bombo Radyo Naga, napag-araman na hale ki Capt. Patrick Jay Retumban, pamayo kan Division of Public Affairs Office (DPAO) kan 2nd Infantry Division, Philippine Army, na nagpaparahay pa sa ospital an nairidong limang mga soldados asin an nadamay na sarong babae asin an duwa kaining mga aki.
Mahigot man na pigkondenar kan Philippine Army an paggamit nin improvised explosive device (IED) kan mga NPA.
Marurumduman na tinambangan kan pigtutubudang mga NPA an tropa kan 514th Engineering Construction Battalion na pasiring kuta na sa banwaan nin Unisan para sa ginigibong digding sarong multi-purpose pavement pasado alas-9 nin aga subago.
