Padagos an pigsasagibong imbestigasyon kan mga otoridad sa Hong Kong dapit sa rason kan pagkagadan kan walong unggoy.
An nasambitan kaya na mga unggoy an nadukayan na mayo ng buhay sa pinakagurang na zoo sa Hong Kong kan nakalihis na Domingo,Oktubre 13.
An mga hayop na ini an De Brazza’s monkey, sarong common squirrel monkey, tolong cotton-top tamarins asin tolong white-faced sakis, na nadukayang gadan sa Hong Kong Zoological and Botanical Gardens (HKZBG), sigun sa pahayag kan Leisure and Cultural Services Department (LCSD).
Mantang naghahalat nin resulta, pigsarado paramientras an mammals section kan zoo para sa disinfection asin paglilinig.
Nagkawsa man nin pagkahadit an insidente dapit sa posibleng outbreak kan zoonotic diseases siring kan monkeypox, na posibleng maipasa gikan sa hayop pasiring sa tawo.
