Full swing na an preparasyon kan Team Bicol para sa Palarong Pambansa sa Agusan del Sur.
Sa intrevista kan Bombo Radyo Naga ki Francisco Dexter O. Sison (Regional Sports Officer, Deped – Bicol), sinaysay kaini na maabot sa 832 na indibidwal an minakompuesto kan rehiyonal na delegasyon. Kabale digdi an mga atleta, coaches, chaperones, assistant coaches, asin mga opisyales kan isports hale sa manlaen-laen na dibisyon kan Rehiyon Bikol. An numerong ini suboot nagpapahiling kan preparasyon kan rehiyon na magpartisipar sa gabos na sports field sa nasyunal na kompetisyon.
Tinawan man nin duon an implementasyon kan estratehikong pagsasanay, orog na sa mga nabisto na “focus sports” arog kan rhythmic gymnastics, aero gymnastics, athletics, boxing, asin pencak silat. An mga nasabing disiplina mas pigsasairarom sa mas mahigot na pagsasanay sa lindong kan mga national trainers kun sain an iba digdi piggigibo ngonian sa Ligao City.
Mientrastanto, nagkondusir na nin division-based training an ibang sports antes an nakatalaan na concentration training para sa gabos na atleta na gigibohon sa Mayo 10 hasta 18 sa Legazpi City asin Ligao City.
Sinabi man ni Sison na nagpuon an preparasyon kan Abril 2, kasunod kan Palarong Bicol, tanganing masierto na dae maapektaran an academic obligations kan mga estudyanteng atleta. Sa ngonian, pig-aaprobetsaran an bakasyon para magtutok sa final phase kan saindang training.
Aminado an opisyal na igwa nin nagkapirang agyat sa operasyon, partikularmente an pagkaatraso kan fondo hale sa Central Office para sa transportasyon asin uniporme. Alagad, ini pigtutugunan sa tabang kan local government units (LGUs), siring man kan liderato kan DepEd Bicol, kabali si Regional Director Gilbert Sadsad asin Assistant Regional Director Bev Sentillas.
Dakula man an naitabang kan 13 division offices sa rehiyon sa pagsuporta sa gastos kan mga atleta na hale sa hararayong lugar.
Nakatalaan na magbiyahe an delegasyon pasiring sa Agusan del Sur sa Mayo 19 pagkatapos kan saindang concentration training.
Tinawang-duon ni Sison na an saindang katuyuhan sa pagpartisipar sa Palarong Pambansa bako sanang makakua nin medalya. Importante suboot an pagtanom nin disiplina asin pagtao nin makahulugan na mga eksperyensya sa mga jovenes, na pwede nindang darahon sa maabot na panahon.
Obheto man kan Team Bicol na mapakarhay an saindang ranking sa nasyonal na kompetisyon ngonian na taon.
