Siyam (9) sa 11 lawas na narekober gikan sa padagos na search and rescue operations katakod kan naglubog na M/V Trisha Kerstin 3 roll-on/roll-off (RoRo) ferry an naidara na sa saindang mga kapariented, sigun sa Basilan Provincial Disaster Risk Reduction and Management Office (PDRRMO).
Sa pahayag kan PDRRMO, apat sa mga lawas an naihatod pasiring Sulu, mantang lima man an dinara sa manlaen-laen na destinasyon sa tabang kan Philippine Coast Guard (PCG).
Duwa pang lawas an dae pa pigkukua kan saindang mga pamilya.Nagpaabot man ni pakikidumamay an PCG sa mga naulilang kaparientes.
Kan nakalihis na Huwebes, Enero 29, nagsakat na sa 29 an numero kan mga binawian nin buhay sa insidente makalihis na marekober an 11 pang lawas sa nagpapadagos na search and retrieval operations.
Huli digde, nangapodan nin hustisya an mga pamilya kan mga nawawarang pasahero asin naghahagad nin mas mahewas na rescue operations.
Ini an makalihis na sabihon kan PCG, na basado sa ship manifest, 10 indibidwal sana an pigkokonsiderar na nawawara.
Marurumdumang naglubog an MV Trisha Kerstin 3 sa kadagatan na sakop kan Pilas Island, Basilan kan nakalihis na Enero 26. Hasta sa presente, dae pa man nanunutaran an mismong RoRo vessel.
Sigun sa mga otoridad, mayo pang nahihiling na bakas kan barko an remotely operated vehicle maski nag-abot na ini sa seabed.
