NAGA CITY – Makakatabang sa mga kapulisan an 911 hotline number tanganing mas maparekas an pagresponde sa papaabuton na kafiestahan sa siyudad nin Naga sa masunod na bulan.
Sa entrevista kan Bombo Radyo Naga ki PSSG Robert Aguillon- Asst. PIO, Naga City Police Office, sinaysay kaini na ngunyan na nagdadangadang na an saro sa mga dakulang kasiribotan sa siyudad nin Naga kun saen bako sana an mga Bicolanong debotos an mapasyar sa nasambitan ng lugar magin an mga pilgrims gikan sa manlaen-laen na parte kan Pilipinas padagos man an saindang pagpreparar tanganing mas mamantinir an katoninongan asin kasalbaduhan kan mga bisita.
Dugang pa kaini an promotion soboot kan 911 sa mga paagi kan media, radyo, telebisyon magin sa manlaen-laen na social media platforms, kun saen ini man mas madaling naipapaabot sa mga residentes asin sa paagi kaini dae na kaipuhan kan mga tawo na magpasiring sa police station orog na kun igwang emerhensiya.
Sigun pa ki Aguillon sa paagi kan 911 hotline numbers mas accessible na para sa mga nangangaipuhan nin tabang asin mas marekas soboot ninda ining marerespondehan.
Mientrastanto, sa maabot man na Setyembre 11 maabot na an augmentation force gikan sa Police Regional Office 5 na iyo man magigin katuwang kan NCPO sa pagmantinir kan paz y orden sa laog kan siyudad.
Siring man, igwa man soboot sindang deployment plan tanganing mas magin organize an pagbugtak kan mga personahes sa saindang kaniya-kaniyang babantayan na lugar.
