NAGA CITY- Pig-aandam na kan Philippine National Police (PNP) an suruon suon na kasong isasangat laban sa walong persona na naarestar kan mga otoridad sa pigkondusir na search warrant operations sa anom na barangay sa Daet, Camarines Norte.
Sa entrevista kan Bombo Radyo Naga ki PS/Supt. Rudolfo Dimas, provincial director kan Camarines Norte Police Provincial Office (CNPPO), sinaysay kaini na nakatalaan na sunadan nin kaso an walong persona na nadakip sa serye nin search warrant operations kan mga kapulisan.
Nakumpiskar kan mga otoridad an 98 sachet nin pigtutubudang shabu, pitong unsealed transparent plastic sachet, sarong sachet nin marijuana, mga bala kan caliber 45 na badil, sarong caliber .22 na badil, hand grenade asin mga drug paraphernalia.
Sigon ki Dimas, nagpapadagos pa an pigkokondusir nindang operasyon tanganing madakop an duwang persona na nagtitinir pang at-large.
Napag-araman na tolo sa mga naarestar na suspetsado an enot ng pigsuko sa hepatura kan mga otoridad katakod kan programang “Oplan Tokhang” kan PNP.
