NAGA CITY– Nakalatag na an mga masunod na lakdang kan 9th Infantry Division katakod kan nangyaring ambush asin nagkapirang mga kariribukang huli sa rebeldeng New Peoples Army (NPA) sa manlaenlaeng parte kan rehiyong Bicol.
Sigon ki MGen. Manolito Orense, commander kan 9th ID, sinaysay kaini na nagsagibo na sinda nin counter-intelligence operation sa mga lugar kun sain igwang nairehistrong kariribukan asin sa Monreal, Masbate kun sain nangyari an pananambang sa pulis na si PO2 Mervin Capellan.
Ini suboot an saro sa saindang hinihiling na aksyon tanganing malikayan an mga posibleng pang-aatake kan makaliwang grupo.
Inako man ni Orense na kinakapuhan ninda an kooperasyon kan namamanwaan tanganing matungkusan na an urulay kan armed conflict sa rehiyon.
Apwera sa nangyaring pananambang sa probinsya kan Masbate, hinarass man kan mga rebelde an kampo kan tropa kan gobyerno sa Daraga, Albay asin sinulo pa an nagkapirang mga heavy equipments sa ipinapatrabahong Bicol International Airport kan nakaaging semana.
