NAGA CITY- Mahigot na pinahimutikan kan lado kan 9th Infantry Division, Philippine Army an sinasabing pigbagat ninda an mga miyembro kan progresibong grupo na makondusir kuta na nin hiro protesta kan nakaaging Mayo 1 sa banwaan nin Milagros, Masbate.
Sa pakikipag-olay kan Bombo Radyo Naga ki Capt. Randy Llunar, chief kan Division of Public Affairs Office (DPAO), sinaysay kaini na nagkondusir sana nin checkpoint an pinagsarong pwersa kan PNP Milagros asin an Philippine Army sa barangay Bacolod, alas-9 nin aga kan Mayo 1.
Digdi suboot pigpara kan mga otoridad an duwang truck na lunad an pigkakarkulong 50 persona na miyembro kan progresibong grupo.
Segun ki Llunar, komo parte kan mas mahigot na operasyon kan mga otoridad katakod kan selebrasyon nin Labor Day sa Masbate, nagkondusir nin mga checkpoint nganing masierto an seguridad asin katoninongan sa nasambitang islang probinsya.
Pinahimutikan ni Llunar na dae tinutugutan kan mga otoridad na magkondusir nin hiro protesta an nasambitang mga persona.
Nahaloy sana suboot an mga ini sa checkpoint huli naman ta mayo sindang naipahiling na permit to rally asin kinaipuhan pang magkua kaini sa lokal na gobyerno.
Pigklaro man ni Llunar na bako an mga militar an nagkondusir nin checkpoint asin nagtabang sana sinda sa mga pulis.
Tinawan doon man kan opisyal na tinugutan man na magkondusir nin hiro protesta an mga progresibong grupo sa Masbate kaya dae pwedeng masabi na pighold ninda an mga ini.
Hale pa suboot sa manlaen laeng mga banwaan sa Masbate an mga personang lunad kan duwang truck.
