Nakaheightened alert an Camarines Sur Police Provincial Office (CSPPO) para sa pagtatao nin seguridad enkaso magkaigwa nin mga hiro protesta sa probinsya nin Camarines Sur.
Sa entrevista kan Bombo Radyo Naga ki PCPT Liza Jane Alteza, PIO kan CSSPO, sinaysay kaini na preparado an mga kapulisan sa anuman na aktibidad na igwa nin kinaaram sa pagkakaaretar ki dating presidente Rodrigo Duterte.
Katakod kaini, mas pinahigot an kapreparadohan kan mga kapulisan sa anuman na posibleng mangyari sa probinsya.
Sa ibong kaini, an pagpapautob nin heightened alert status kan mga kapulisan sa bilog na nasyon an dae man dapat ikahadit kan publiko nin huli ta naaayon sana ini lakdang kan mga kapulisan.
Mientrastanto, an enot na saindang pigbabantayan an highways na pig-aagihan kan mga motorista, kun kaya nagkakaigwa nin random asin dictated check points sa mga borders sa probinsya, partikulamente na sa Bato asin Del Gallego.
Sa ngunyan, mayo pa nin nairerehistro na nagsagibo nin hiro-protesta huli sa nasambitan ng pangyayari, alagad enkaso man magsagibo, nagpagirumdom an opisyal na dae sana magbalgar sa ley.
