NAGA CITY – Pigheras kan opisyal kan Naga City Gender and Development Council an saindang adbokasiya katakod kan pagselebrar kan Women’s Month.
Sa entrevista kan Bombo Radyo Naga ki Aldo Niño Ruivivar, Naga City Council for Women Secretariat, sinaysay kaini na puon pa kan Marso 1, nagkaigwa sinda nin advocacy video na nagpapahaling kan saindang kampanya para sa mga kababayehan na nagtatao nin suporta para sa Safe Spaces Ordinance, an lokal na ordinansa sa siyudad nin Naga.
Katuwang ninda digdi an manlaen-laen na ahensiya kan gobierno asin iba pang mga organisasyon sa siyudad.
Obheto kaini an tanganing mapatibay an nasambitan ordinansa.
Mientrastanto, naglalangkaw man an numero kan mga nagrereport na naabusong kababaihan sa siyudad nin huli na ta nagigin aware na an mga biktima kan siring na krimen, na igwa nin opisina na saindang mahahagadan nin tabang asin madudulokan.
Katakod kaini, pig-enkaminar man kan opisyal an mga kababayehan partikulamente na an mga nabibiktima kan pang-aabuso na dae magsayuma na magsumbong asin maghagad nin tabang tanganing malikayan na liwat mangyari an siring na insidente asin tanganing magin salbado na lugar an siyudad nin Naga.
