NAGA CITY- Pinagpepreparan na kan LDRRMO Pasacao an piglalaoman na pagdagsa kan mga beach goers sa saindang banwaan sa kasabay kan Holy Week.
Sa entrevista kan Bombo Radyo Naga ki Edmer Miravalles, pamayo kan LDRRMO Pasacao, sinaysay kaini na makundusir sinda nin rescue training sa mga bay watchers kan mga resort na iyo an mamangno asin maresponde sa panahon kan emerhensiya.
Sigun ki Miravalles, obheto kan nasambitan ng training na matawan nin bastanteng kaaraman an mga bay watchers sa saindang mga responsabilidad asin mga paagi sa pagsalbar nin buhay kan sarong tawo.
Dugang pa kan opisyal, sa pigkundusir man na One Stop Shop kan nakalihis na mga bulan, saro sa mga hinagad na requirements kan lokal na gobierno kan Pasacao para sa mga beach owners iyo an pagkakaigwa nin mga life guard na igwang kakayanan asin bastanteng training tanganing maasegurar na salbado an mga nagbibisita sa mga kadagatan na sakop kan banwaan nin Pasacao.
Mientrastanto, para man sa mga biyahero liwat na pig-aabisuhan an mga ini sa mga tinampo na under constructions kun saen igwa naman soboot sindang piglatag na mga safety measures siring kan caution tape tanganing malikayan an mga aksidente orog na kun naggagabat an trapiko huli sa paglaog kan mga lunadan.
Sa ngunyan, hagad na sana liwat kan opisyal sa publiko orog na sa mga mabisita sa saindang banwaan na pirmeng magsunod sa mga panundon na piglatag kan saindang LGU tanganing dae mabugtak sa alanganin na sitwasyon.
