NAGA CITY- Preparado na an Camarines Sur Maritime Police Station para sa piglalaoman na pagdagsa kan mga pasahero asin mga turista sa banwaan nin Pasacao.
Sa entrevista kan Bombo Radyo Naga ki PSSg Joel G. Moriño Jr., PCR PNCO, sinaysay kaini na nagpuon na an summer vacation preparation kan saindang opisina katabang an Philippine Coast Guard kun saen sinda an nagpapasiring sa mga beach resort sa saindang banwaan tanganing mag-inspect komo pagsierto sa kasalbaduhan kan mga beach goers.
Apwera digde, igwa man pigkukundusir na Comelec Checkpoint puon Port kan Pasacao pasiring sa Burias Island sa Masbate.
Katakod digde, mahigot an inspeksyon sa mga bagahe na bitbit kan mga pasahero o mga travellers tanganing malikayan na makalaog an mga iligal na droga orog na ta igwa na soboot nakalusot asin naka-abot pa sa Cebu.
Yaon man an port visibility kan mga personahe kan Camarines Sur Maritime Police Station na iyo man nagbabantay tanganing dae makalaog an mga deadly weapons asin iba pa na ipinagbabawal na darahon kan mga pasahero.
Pigsierto man ni Moriño na gabos kan saindang mga personahe an well trained para sa search and rescue orog na sa mga emerhensiya.
Sa ngunyan, sa mga masunod na aldaw orog na sa panahon kan Semana Santa, piglalaoman kan hepatura an pagdagsa kan mga mabisita sa saindang lugar orog na ta bistado an Pasacao komo Summer Capital kan probinsiya nin CamSur.
