Nagtitinir na kanselado an klase sa mga eskwelahan sa pirang syudad asin man banwaan sa Negros Occidental, kasunod kan liwat na pagputok kan nakalihis na aldaw (April 8) kan bulkang Kanlaon.
Kabali sa mga nagsuspinder iyo an mga eskwelahan sa La Carlota City, Bago City, La Castellana, Pontevedra, asin Isabela.
Padagos man na pigbabantayan kan Department of Education an epekto kan nangyari na pagsabog sa mga eskwelahan, orog na an dagusang pagbagsak nin abo asin man iba pang volcanic materials na enot na ibinuga kan bulkan.
Kaiba man sa minomonitor an salud kan mga estudyante. Basado sa record kan Disaster Risk Reduction and Management Service kan DepEd hasta kaining nakalihis na bulan, 11 eskwelahan pa an ginagamit komo mga evacuation center, kaya man rinibong mga estudyante an dae pa nakakabalik sa face-to-face classes.
Apektado digde an kabilogang 11,177 estudyante asin 441 faculty asin school personnel. An mga ini ay apektado magpuon sa enot na pagsabog kan bulkan kan nakalihis na bulan nin Disyembre kan nakalihis man na taon.
