NAGA CITY- Pigtawan duon kan panel kan Commission on Elections na determinado sinda na panimbagon an vote-buyers o siisay man na nag-asister tanganing maikundusir ini.
Sigun ki Comelec Regional Elections Director Maria Juana Valeza, an Comelec Committee on Kontra Bigay (CKB) an presenteng pig-iimbestigaran an 48 kaso kan vote-buying sa Bicol.
Basado soboot kaya sa report, an Bicol Region an igwang pinakahalangkaw na insidente kan vote-buying sa bilog na Pilipinas.
Katakod kaini, pigsaysay pa ni Valeza na an komitiba nag-isyu na nin subpoena sa mga respondents kan vote-buying complaints.
Mas pinahigot pa kan Comelec Committee on Kontra Bigay (CKB) an saindang paglalapihot kontra sa against vote buying asin vote selling sa paagi kan pagpapakusog kan law enforcement agencies kabali na an kapulisan asin kasuldaduhan tanganing magkundusir nin surveillance asin magguno nin ebidensiya kontra sa electoral violation.
An pinahigot na police operations kontra sa vote-buying an komo parte kan kasuguan ni Presidente Ferdinand Marcos Jr. para sa malinig, honesto asin patas na eleksyon.
Marurumduman, sa irarom kan Comelec Resolution 11104, an vote-buying asin vote-selling pigkakategorya komo possession o distribution kan kwarta, goods o campaign materials na obhetong impluwensiyahan an mga botante.
An Vote-buying asin vote-selling na pigtawan depinasyon sa irarom kan Article 12 of the Omnibus Election Code, an punishable sa paagi kan pagkakakarsel nin nasa saro hasta anom na taon.
