NAGA CITY- Pig-anunsyar kan Police Regional Office Bicol na nakumpiskar kan saindang hepatura an nasa P2.99 million na kantedad kan illegal drugs sa pigkudusir na serye kan operasyon puon June 16 hasta 22.
Sigun ki PRO-5 Director Brig. Gen. Andre Dizon igwang kabilugang 32 anti-illegal drug operations an pigkundusir na nagresulta sa pagkaka-arestrar kan nasa 33 na suspek.
An illegal na droga na nakumpiskar kinabababihan kan 438.1 grams na shabu asin 140 grams kan dried marijuana leaves.
Sa anom na probinsiya sa Rehiyong Bicol asin sarong component city, an Naga City nakapagrehistro nin pinakahalangkaw na nasasamsam kan nasambitan ng illegal drugs na igwang pigkakarkulo na labi sa P1-M.
Katakod kaini, pigsaysay kan opisyal na an mga naarestrar na indibidwal an mahahampang sa magkakanigong kapadusahan sa pagbalgar sa Republic Act No. 9165 o mas bistado komo Comprehensive Dangerous Drugs Act of 2002.
Mientrastanto, pig-enkaminar man ni Dizon an publiko na suportaran an mga kapulisan sa paagi kan pag-report sa mga kahina-hinalang aktibidad sa komunidad.
Pig-enkaminar man kaini an publiko na magtinir na vigilante asin mag-establisar nin komunikasyon sa publiko tanganing tolos na masimbagan an mga drug-related activities asin iba pang krimen.
Sa ngunyan, pigsierto na sana kan opisyal na yaon an saindang mga personahe tanganing mamantinir an paz y orden sa bilog na Rehiyong Bikol.
